Tashna Azmi
gareban chaak karne se hamen fursat bhi milti hai
rahe tu mehrban to ilm ki daulat bhi milti hai
ḳhuda rakkhe tujhe ai sha.iri teri badaulat hi
hamen izzat bhi milti hai hamen shohrat bhi milti hai
dar-e-janan ko ham ne is liye ab tak nahin chhoḌa
jahan kuchh ranj milta hai vahin rahat bhi milti hai
ibadat se faqat ḳhush-nudi-e-maula nahin milti
sitam-gar tujh se laḌne ki hamen himmat bhi milti hai
ghalat aa.e to honTon par tabassum DhunDne vaalo
yahan aansu bahane se kabhi mohlat bhi milti hai
bahut hi soch kar apne qadam rakhna ḳhirad vaalo
ye rah-e-ishq hai is raah men vahshat bhi milti hai
salamat hai agar iman ai ‘tashna’ yaqin kar lo
ki jis par naaz hai rizvan ko vo jannat bhi milti hai
Leave a Reply