atish-e-bagh aisi bhadki hai ki jalti hai hava
kucha-e-gul se dhuan ho kar nikalti hai hava
girya-e-ushshaq se kichad hai aise ja-ba-ja
thaam kar divar-o-dar galiyon men chalti hai hava
gulshan-e-alam ki nairangi se hota hai yaqin
phir shagufa phulta hai phir badalti hai hava
dekhiye ja kar zara kaifiyyat-e-josh-e-bahar
jhumte hain ped gir gir kar sambhalti hai hava
na-rasai dekhna udta hai jab mera ghubar
yaar ke kothe ki kanis se phisalti hai hava
garmiyon men sair gulzaron ki bhati hai mujhe
har qadam par pankhiya phulon ki jhalti hai hava
‘bahr’ pankha haath se rakh do nihayat zaar huun
mauj-e-dariya ki tarah mujh ko kuchalti hai hava
Leave a Reply