ḳhushi se jhumti phirti hai aur phir muskurati hai
miri taaza ghazal vo yaad kar ke gungunati hai
tumhen cigarette se nafrat hai to ye kyon bhuul baiThe tum
tumhen jis se mohabbat hai use cigarette bachati hai
nahin ma.alum mera hafiza kis samt rahta hai
magar vo yaad rakhti hai janam din tak manati hai
use bujhte diyon se itni uljhan hai ki mat puchho
koi jo laḌkhaḌa jaa.e use fauran jalati hai
kitaben chiḳhne lagti hain jab vo paas se guzre
inhen vo chuum ke rakhti hai siine se lagati hai
zahin itni hai us se bahs to ham kar nahin sakte
mujhe manTo ke afsane bila-nagha sunati hai
Leave a Reply