Kaba-E-Dil Ko Agar Dhaiyega

kaaba-e-dil ko agar Dhaiyega

yaad rakhiye ki saza paiyega

yaad men meri jo ghabraiyega

meri turbat pe chale aiyega

thodi taklif sahi aane men

do ghadi baith ke uth jaiyega

yaad dilva ke vo agli baten

bhari mahfil men na rulvaiyega

hal-e-dil kahiye to farmate hain

bakte bakte mira sar khaiyega

yak zara aap ko ham dekh to len

baithiye baithiye phir jaiyega

ye ‘haqir’ aap se Darne ka nahin

ankhen bas ghair ko dikhlaiyega

Leave a Comment