Nazeer Siddiqui
a.ankhon men be-ruḳhi nahin dil men kashidgi nahin
phir bhi jo dekhiye to ab pahli si dosti nahin
rasm-e-vafa ka iltizam ahd-e-vafa ka ehtiram
sheva-e-ashiqi to hai fitrat-e-ashiqi nahin
ham se shikayaten baja ham ko bhi hai magar gila
pahle se ham nahin agar pahle se aap bhi nahin
bazm-e-tarab men dosto dekh raha huun main yahi
raqs men aadmi to hain raqs men zindagi nahin
manzil-o-rah men kabhi itna to fasla na tha
rahbaro ḳhata-muaf ye koi rahbari nahin
ilm-o-hunar ke faiz se ilm-o-hunar ke bavajud
mahfil-e-zist men ‘nazir’ rang hai raushni nahin
Leave a Reply