Sahar Ansari
mahsus kyuun na ho mujhe beganagi bahut
main bhi to is dayar men huun ajnabi bahut
-asan nahin hai kashmakash-e-zat ka safar
hai agahi ke ba.ad gham-e-agahi bahut
har shaḳhs pur-ḳhulus hai har shaḳhs ba-vafa
aati hai apni saada dili par hansi bahut
us jan-e-jan se qat-e-ta.alluq ke bavajud
us rahguzar men aaj bhi hai dilkashi bahut
is vaz-e-ehtiyat ki zanjir ke liye
main ne bhi ki hai shahr men avargi bahut
msatana-var vadi-e-gham tai karo ‘sahar’
baaqi hain zindagi ke taqaze abhi bahut
Leave a Reply