Poet
puchhte hain tiri hasrat kya hai
aaj mujh par ye inayat kya hai
kya kahun rang-e-tabi.at kya hai
ek aafat hai mohabbat kya hai
zab.h karte ho jo munh pher ke tum
aisi bhi meri muravvat kya hai
jis men tum ḳhush usi men main ḳhush huun
ranj kya chiiz hai rahat kya hai
bolti hi nahin tasvir tiri
phir mire jiine ki surat kya hai
kisi avara-vatan se puchho
mehrban-vari-e-ghurbat kya hai
zab.h ke vaqt ruka bhi ḳhanjar
ye na puchha tiri hasrat kya hai
umr guzri usi ke kuche men
ham se puchho ki mohabbat kya hai
mai ho sabza ho ghaTa ho tum ho
is se achchhi mujhe jannat kya hai
ghair se va.ada lahad par meri
ye qayamat sar-e-turbat kya hai
ye to hai ain mohabbat ai dil
un ke shikve ki shikayat kya hai
shaiḳh ji roza to din men hoga
shab ko piine men qabahat kya hai
mujh se kahti hai ye vahshat meri
ghar men rahne ki zarurat kya hai
bhuul kar bhi na kabhi ye puchha
haal bimar-e-mohabbat kya hai
ham ne ḳhud piine se tauba kar li
shaiḳh sahab ki karamat kya hai
sajde karta huun dar-e-janan par
aur a.in-e-mohabbat kya hai
zikr-e-mai aur janab-e-va.iz
nahin malum ki niyyat kya hai
ek Thokar se uThi hai sau baar
aap ke aage qayamat kya hai
jaan hi le ke Talegi ‘safdar’
ik bala hai shab-e-furqat kya hai
Leave a Reply