kisi ki yaad ko apna shi.ar kar lenge
faza-e-dahr ko ham sazgar kar lenge
ham apne gham ko ḳhushi men shumar kar lenge
ḳhizan ke daur men jashn-e-bahar kar lenge
rasa.i hogi jo is bazm men kabhi apni
nasib valon men apna shumar kar lenge
kabhi milega jo izn-e-ubudiyat ham ko
to ek saans men sajde hazar kar lenge
raha karam jo tumhara to bahr-e-hasti se
ham apni kashti-e-ummid paar kar lenge
tiri talash men a.enge kaam dagh-e-jigar
ham un se raushni-e-rah-guzar kar lenge
ḳhushi se milne lage hain vo aaj kal ham se
ham apni ziist ko ab ḳhush-gavar kar lenge
nazar hai dar pe hamari ki dam hai ankhon men
abhi kuchh aur tira intizar kar lenge
ham apne ḳhalq ki duniya sanvar kar ‘ḳhushtar’
husul-e-rahmat-e-parvardigar kar lenge
Leave a Reply