hai jab tak dasht-paimai salamat
rahegi abla-pai salamat
rahe jab tak ye binai salamat
hamari khama-farsai salamat
bahut sanvarenge sang o sar ke rishte
junun ki kar-farmai salamat
bahut hairan hain aina-khane
tire qamat ki zebai salamat
sabhi hathon men le kar sang aae
khirad ki jalva-arai salamat
bahut dekhe bahar-amez manzar
tiri yadon ki raanai salamat
hijab us ne kiya asuda-e-gham
ye andaz-e-masihai salamat
Leave a Reply