kuchh sazgar jab mire halat bhi nahin
aise men mere sar pe tira baat bhi nahin
mushtaq-e-did bhi nahin ye tarfa baat hai
dil men ḳhayal-e-tark-e-mulaqat bhi nahin
kahta nahin main aap ko begana-ḳhu magar
pahle si mujh pe lutf-o-inayat bhi nahin
mujh ko banaya mumlikat-e-gham ka tajdar
aur mere lab pe shukr ke kalmat bhi nahin
kis se karun ummid main hajat-ravai ki
juz tere koi qibla-e-hajat bhi nahin
saaqi ne bhi mujhe nazar-andaz kar diya
mujh par nigah-e-mir-e-ḳharabat bhi nahin
‘ajiz’ huun ḳhat likhun to unhen kis tarah likhun
kaghaz nahin qalam nahin davat bhi nahin
Leave a Reply