kisi ko kya khabar ai subh vaqt-e-sham kya hoga
khuda jaane tire aghaz ka anjam kya hoga
giraftaran-e-gesu par nahin kuchh munhasir naseh
phansa hai jo taalluq men use aram kya hoga
abas hai zahidon ko mai-kashi men uzr-e-nadari
guru rakh len usi ko jama-e-ehram kya hoga
vahi rah rah ke ghabrana vahi na-kar-gar aahen
siva is baat ke tujh se dil-e-nakam kya hoga
use bhi jald utha kar taq-e-nisyan ke havale kar
nahin pesh-e-nazar jab khatm to saaqi jaam kya hoga
yahi tuute subu mitti ke kaafi hain qanaat kar
bilorin jam-e-mai ai rind dard-asham kya hoga
taqarrub jin ko hai un ko bhi yak-guna hai mayusi
ye halat hai to phir didar tera aam kya hoga
na puchho muftiyan-e-shara ka ahval jaane do
tanaffur kufr ko jis se ho vo islam kya hoga
sahar furqat ki hai aur ghash pe ghash aate hain ashiq ko
abhi se jab ye halat ho gai ta-sham kya hoga
zaifi men tu ‘shad’ allahu-akbar pi gaya khum tak
javani men kaho ye rind mai-asham kya hoga
zamana ‘shad’ begari men kyuun akhir phansata hai
apahij kar diya piiri ne mujh se kaam kya hoga