hujum-e-yas men jiina bhi ik azaab hua
yahi hua ki mohabbat men dil ḳharab hua
chhupa hua hai jo chehra haya ke daman men
na koi a.ina us husn ka javab hua
baham ulajhte rahe shaiḳh-o-barahman ab tak
jo ham uThe to zamane men inqalab hua
tumhare hukm pe hasti miTa chuke ham to
magar hamari vafaon ka kya javab hua
miri nava se larazne laga nizam-e-kohan
mira payam ‘ziya’ vaj.h-e-inqalab hua
Leave a Reply