Poet
kohsaron men nahin hai ki bayaban men nahin
baghban husn faqat tere gulistan men nahin
mauj-e-dariya ki ravani ki ghaTaon ka ḳhiram
kaun si baat tiri zulf-e-pareshan men nahin
tujh se ho tark-e-jafa mujh se vafa.en chhuTen
vo tire bas men nahin ye mire imkan men nahin
ḳhair dhundla.i si thi raushni-e-sham-e-ḳhizan
baghban vo bhi to is sub.h-e-baharan men nahin
chhin le saqi-e-be-faiz ke hathon se subu
rind kya aisa koi mahfil-e-rindan men nahin
uljhanon ka ho asar kyuun na sukun-e-dil par
rabt kya ham-nafaso sahil-o-tufan men nahin
ḳhanda-e-gul ho ki ho girya-e-shabnam ‘fazil’
dastan gham ki nihan kaun se unvan men nahin
Leave a Reply