Kashif Husain Ghair
muddat se koi shor bapa ho nahin raha
aur haath hai ki dil se juda ho nahin raha
ik sub.h thi jo shaam men tabdil ho ga.i
ik rang hai jo rang-e-hina ho nahin raha
ham bhi vahi diya bhi vahi raat bhi vahi
kya baat hai jo raqs-e-hava ho nahin raha
ham bhi kisi ḳhayal ke sannahaTon men gum
tum se bhi pas-e-ahd-e-vafa ho nahin raha
kya chahti hai ham se hamari ye zindagi
kya qarz hai jo ham se ada ho nahin raha
Leave a Reply