din hua kat kar gira main raushni ki dhaar se
khalq ne dekhe lahu men raat ke anvar se
ud gaya kaala kabutar mud gai khvabon ki rau
saya-e-divar ne kya kah diya divar se
jab se dil andha hua ankhen khuli rakhta huun main
us pe marta bhi huun ghafil bhi nahin ghar-bar se
khaak par udti bikharti purza purza aarzu
yaad hai ye kuchh hava ki akhiri yalghar se
ab to barish ho hi jaani chahiye us ne kaha
taaki bojh utre purani gard ka ashjar se
ishq to ab sher kahne ka bahana rah gaya
harf ko rakhta huun raushan shoala-e-afkar se
shahr ke naqshe se main mit bhi chuka kab ka ‘zafar’
char-su lekin chamakte hain mire asar se
Leave a Reply