Kal Raat Dhale

kal raat Dhale ye socha main ne

main apne khazane saaf kar luun

kis kis ka hai qarz mujh pe vajib

is ka bhi zara hisab kar luun

almari ki chabi kho gai thi

vo zang bhari purani chabi

main ne use kone kone DhunDa

mujh ko to nahin mili kahin bhi

main ne jo nazar utha ke dekha

almari to band hi nahin thi

mitti ki tahon men lipte jaale

ik khaak ka Dher lag rahe the

vo saari nishaniyan hamari

vo saari kahaniyan hamari

shoale ki tarah bhadakne vaali

dhadkan ki tarah dhadakne vaali

aram ki niind so rahi thiin

un men koi raushni nahin thi

un men kahin zindagi nahin thi

Leave a Comment