Mubarik Siddiqi
ḳhizan ki rut men gulab lahja bana ke rakhna kamal ye hai
hava ki zad pe diya jalana jala ke rakhna kamal ye hai
zara si laghzish pe toḌ dete hain sab ta.alluq zamane vaale
so aise vaison se bhi ta.alluq bana ke rakhna kamal ye hai
kisi ko dena ye mashvara ki vo dukh bichhaḌne ka bhuul jaa.e
aur aise lamhe men apne aansu chhupa ke rakhna kamal ye hai
ḳhayal apna mizaj apna pasand apni kamal kya hai
jo yaar chahe vo haal apna bana ke rakhna kamal ye hai
kisi ki rah se ḳhuda ki ḳhatir uTha ke kanTe haTa ke patthar
phir us ke aage nigah apni jhuka ke rakhna kamal ye hai
vo jis ko dekhe to dukh ka lashkar bhi laḌkhaḌa.e shikast khaa.e
labon pe apne vo muskurahaT saja ke rakhna kamal ye hai
Leave a Reply