shoala-e-ah ne sikha hai jalana dil ka
nahin milta hai jo pahlu men thikana dil ka
shokhiyan aengi badhne do abhi sin un ka
zulf-e-pur-pech sikha degi phansana dil ka
nae andaz se lete hain vo dil ashiq ka
ravish-e-naz se sikha hai churana dil ka
surat-e-barg-e-hina kis ne banaya tum ko
pesh kar paae nigarin men lagana dil ka
kya mujhe dasht-navardi ka maza deta hai
justuju men tiri yuun khaak udana dil ka
kya khabar thi vo pae sair idhar aaega
sikhta parda-e-pahlu men chhupana dil ka
un ke kuche men bapa fitna-e-mahshar na kare
shab-e-tarik men kya shor machana dil ka
tur-e-ulfat pe chalo ta main dikhaun tum ko
ho ke behosh kabhi hosh men aana dil ka
shukr kar shukr ‘jamila’ ki zahe tera nasib
ho gaya kucha-e-jilan men thikana dil ka
Leave a Reply