be-vafa na-mehrban ye sach hai vo aisa to tha
mat kaho kuchh us ko yaaro jo bhi tha mera to tha
bhiiḌ itni hai nagar men kis jagah DhunDun use
ek chehra kuchh dinon pahle kahin dekha to tha
raat aa.i aur aa ke mujh ko tanha kar ga.i
kam se kam din tha to mere saath ik saaya to tha
ab to ik muddat hui koi sada aati nahin
jin dinon TuuTa tha dil ik shor sa uTTha to tha
ham ‘hasan’ ko jante hain aadmi achchha na tha
do-ghaḌi ko paas aa ke dil ko bahlata to tha
Leave a Reply