Zareef Lakhnavi
mahsharistan-e-junun men dil-e-nakam aaya
naala hangama-navazi pe sar-e-sham aaya
mehr az-ru-e-mualla jo lab-e-bam aaya
dekhiye dekhiye ab dhuup ga.i ghaam aaya
barq ki sho.ala-navazi sabab-e-tul-e-hayat
fitrat-e-maut tiri ziist ka hangam aaya
muntashir ho ga.e jis vaqt sab ajza-e-hayat
qatra dariya men ba-andaza-e-anjam aaya
tausan-e-umr-e-gurezan ki subuk-raftari
kaam deti nahin jab maut ka paigham aaya
markaz-e-ruh ye hai kashmakash-e-maut-o-hayat
phir bhi varaftagi-e-shauq pe ilzam aaya
main vo asuda-e-soz-e-ḳhalish-e-mizhgan huun
jis ko rah-e-talab-e-shauq men aram aaya
tuur se ik kashish-e-mashq thi surat-gar-e-shauq
tujh par ai vadi-e-aiman abas ilzam aaya
sard-mehri se kisi ko jo hui hajat-e-ghusl
garm-joshi ko baghal men liye hammam aaya
zulf ke jaal men ma.ashuq ka sar hai ḳhud bhi
qaidiyon muzhda ki sayyad tah-e-dam aaya
qabr se rasta sidha hai ḳhuda ke ghar ka
jo udhar jaane laga bandh ke ehram aaya
hai agar naam isi ka adbiyat-e-latif
to ‘zarif’ is ko kahen kya jise ye kaam aaya
Leave a Reply