Sohail Akhtar
jannat se nikala na jahannum se nikala
us ne to mujhe ḳhosha-e-gandum se nikala
rakha hai mujhe aaj talak mauj men us ne
jis lahar ko girdab-o-talatum se nikala
ye bhuul hi baiTha tha zaban rakhta huun main bhi
so ḳhud ko tire sahr-e-takallum se nikala
is adat-e-taḳhir ko ik umr hai darkar
mushkil se tabi.at ko taqaddum se nikala
tadbir ko taqdir ki ghaflat se jagaya
ummid ko bhi tohmat-e-anjum se nikala
lagta tha nikal hi nahin pa.unga ‘suhail’ ab
us ne to mujhe ek tabassum se nikala
Leave a Reply