dil ko isi sabab se hai iztirab shayad
qasid phira hai le kar ḳhat ka javab shayad
ankhen chaḌhi hui hain baten hain bahki bahki
aa.e ho tum kahin se pi kar sharab shayad
kya jaane kis hava men itna ubhar raha hai
hasti nahin samajhta apni habab shayad
mujh par jo vo sahar se is darja mehrban hain
shab ki dua hui hai kuchh mustajab shayad
bimar huun bandhi hai dhun rat-din safar ki
ghurbat men apni miTTi hogi ḳharab shayad
pichhle se vasl ki shab asar sub.h ke hain
niklega raat hi se aaj aftab shayad
aaya bahut dinon par zahid jo mai-kade men
bhuli hui thi us ko rah-e-savab shayad
barsat ki kami se kya qadr ghaT ga.i hai
aisi kabhi biki ho arzan sharab shayad
apne dimagh men to ab ye basi hui hai
behtar tire pasine se ho gulab shayad
bazm-e-adu men aa kar jis tarah ham jale hain
dozaḳh men ho kisi par aisa azaab shayad
ashkon se tar hui thi yuun raat sej un ki
yaad aa gaya tha koi hangam-e-ḳhvab shayad
ai shaiḳh tu mila kar dekh un se umr apni
huron ka Dhal gaya ho ab to shabab shayad
tauba ‘hafiz’ mai ka paḌ jaa.e jis ko chaska
phir us se marte dam tak chhuTe sharab shayad
Leave a Reply