Hasti Koi Aisi Bhi Hai Insan Ke Siwa Aur

hasti koi aisi bhi hai insan ke siva aur

maz.hab ka ḳhuda aur hai matlab ka ḳhuda aur

phir thahar gaya qafila-e-dard suna hai

shayad koi raste men miri tarah gira aur

ik jurra-e-aḳhir ki kami rah ga.i aḳhir

jitni vo pilate gae ankhon ne kaha aur

mimbar se bahut fasl hai maidan-e-amal ka

taqrir ke mard aur hain mardan-e-vigha aur

allah gila kar ke main pachtaya huun kya kya

jab ḳhatm hui baat kahin us ne kaha aur

kya zer-e-lab dost hai iz.har-e-jasarat

haq ho ki vo nahaq ho zara lai to badha aur

daulat ka to pahle hi gunahgar tha mun.im

daulat ki mohabbat ne gunahgar kiya aur

ye vahm sa hota hai mujhe dekh ke un ko

sirat ka ḳhuda aur hai surat ka ḳhuda aur

Leave a Comment