Makhmoor Saeedi
dil ke varaq-e-sada pe kuchh rang ubharen
ḳhun-gashta tamannaon ki tasvir utaren
shayad koi rauzan koi khiḌki nikal aa.e
sar apna chalo vaqt ki divar se maren
kab tak dil-e-divana ye be-vajah ta.aqub
ab haath kahan a.engi ram-karda baharen
barham hui vo mahfil-e-yaran-e-ḳhush-auqat
tanha.i ke lamhat kahan ja ke guzaren
angan ki udasi ko fuzun kar ga.iin ‘maḳhmur’
divar pe baiThi hui chiḌiyon ki qataren
Leave a Reply