Hum Ko Lutf Aata Hai Ab Fareb Khane Mein

ham ko lutf aatā hai ab fareb khāne meñ

āzmā.eñ logoñ ko ḳhuub āzmāne meñ

do-ghaḌī ke sāthī ko ham-safar samajhte haiñ

kis qadar purāne haiñ ham na.e zamāne meñ

tere paas aane meñ aadhī umr guzrī hai

aadhī umr guzregī tujh se uub jaane meñ

ehtiyāt rakhne kī koī had bhī hotī hai

bhed hamīñ ne khole haiñ bhed ko chhupāne meñ

zindagī tamāshā hai aur is tamāshe meñ

khel ham bigāḌeñge khel ko banāne meñ

Leave a Comment