poet

Amal Kuchh Aisa Kiya Adu Ne Ki Ishq Baham Laga Chhudaya

amal kuchh aisa kiya adu ne ki ishq baham laga chhudaya

ilahi chhut jaaen us ki nabzen milap jis ne mira chhudaya

na baithe aram se vo gaahe uthae nit dukh pe dukh khudaya

ki jis ne nahaq utha ke bohtan apna vaan baithna chhudaya

ilahi mahrum rakhiyo us ko mudam lazzat-e-do-jahan se

asir-e-dam-e-firaq kar mujh ko jis ne mera maza chhudaya

na dosti ka use mile phal na koi marbut hove us se

ki jis ne kar dushmani khudaya jo rabt aapas men tha chhudaya

urus-e-giti samajh ke us ko zalil hargiz na munh lagave

ilahi aqd-e-mohabbat us se ye jis ne mera bandha chhudaya

chhute gareban us ka gaahe na panja-e-ranj se khudaya

ki daman-e-vasl haath apne se jis ne us shokh ka chhudaya

ilahi zindan-e-gham se paave na jite-ji vo kabhi rihai

ki jis ke bahkae se ab us ne dil apna ham se phansa chhudaya

lahu jo mushtaq vasl ka tha chhuta na qadmon se us ke hargiz

agarche dho dho ke us ne kitna ba-shakl-e-rang-e-hina chhudaya

kahe hai ‘jurat’ yahi ba-takrar dard-e-hijran se haath mal mal

ilahi chhut jaaen us ki nabzen milap jis ne mira chhudaya

More Poems

Leave a Comment