abbas-dana

Koi Subut-e-Jurm Jagah Par Nahin Mila

koi subut-e-jurm jagah par nahin mila

tuute pade the aaine patthar nahin mila

patthar ke jaisi be-hisi us ka nasib hai

vo qaum jis ko koi payambar nahin mila

jab tak vo jhuut kahta raha sar pe taaj tha

sach kah diya to taaj hi kya sar nahin mila

ham rat-bhar jalen bhi tumhen raushni bhi den

ham ko charagh jaisa muqaddar nahin mila

shahr-e-sitam bhi jashn-e-aman mat mana abhi

shayad sitamgaron ko tira ghar nahin mila

maan baap ki duaon se badh kar jahez men

dulhan ko aur koi bhi zevar nahin mila

‘dana’ vo ab bhi aata hai tanhaiyon men yaad

duniya ki bhiid men jo bichhad kar nahin mila

More Poems

Leave a Comment