Saba Akbarabadi
kasrat-e-jalva ko a.ina-e-vahdat samjho
jis ki surat nazar aa.e vahi surat samjho
gham ko gham aur na musibat ko musibat samjho
jo dar-e-dost se mil jaa.e ghanimat samjho
jhuk ke jo sainkaḌon fitnon ko jaga sakti hain
vo nigahen agar uTThen to qayamat samjho
nahin hote hain riya-kari ke sajde mujh se
main agar sar na jhuka.un to ibadat samjho
rafta rafta miri ḳhuddari se vaqif hoge
abhi kuchh din mire andaz-e-mohabbat samjho
jalva dekhoge kahan dil ke alava apna
mire TuuTe hue a.ine ki qismat samjho
kam nahin duur asiri men sahara ye bhi
qaid men yad-e-nasheman ko ghanimat samjho
ḳhuub samjhaya hai ye katib-e-qismat ne hamen
jo mayassar ho jahan men use qismat samjho
ham-jafaon ko bhi andaz-e-inayat samjhen
aur tum shukr-e-sitam ko bhi shikayat samjho
meri ankhon men abhi ashk bahut baaqi hain
tum jo mahfil men charaghon ki zarurat samjho
ai ‘saba’ kyuun ho dar-e-ghair pe tauhin-talab
apne hi dar ko hamesha dar-e-daulat samjho
Leave a Reply