Dheerendra Singh Faiyaz
mire ḳhayal men thi mere hafize men thi
ajiib shai thi magar phir bhi fasle men thi
badan se jaan to kab ki juda hui ya.ani
hamari saans abhi tak mughalate men thi
hamari niind jo bahki to ye khula ham par
hamari aankh tire ḳhvab ke nashe men thi
vo baat hi nahin janan kisi tasavvur men
jo ek baat faqat tujh ko sochne men thi
so aaj toḌ diya aur ho ga.e tanha
tamam roz se ik shakl aa.ine men thi
na aate sach men magar ḳhvab men to aana tha
dar-asl raat miri niind asare men thi
Leave a Reply