tira husn hai vo sahba ki koi misal kya de
kabhi tishnagi bujha de kabhi tishnagi baḌha de
ye jahan hai ik tamasha koi dost hai na dushman
vahi aag raushni de vahi ashiyan jala de
ye tariq-e-dilbari hai ki ada-e-dil-navazi
kisi jurm par navaze kisi jurm par saza de
abhi zulmat-e-ḳhirad men hai vafa ki tabnaki
ye charagh bujh na jaa.e koi is ki lau baḌha de
ye qadam qadam pe zulmat ye ravish ravish andhere
miri be-ḳhudi kahan hai mujhe rasta bata de
ye tasavvur-e-riha.i rahe kyuun nazar men ‘gauhar’
mujhe qaid karne vaale mire bal-o-par jala de
Leave a Reply