khatme se pahle agar khatm hona hai to samajh lo ki khatma ho chuka hai
silai machine par meri aurat ki niind men soi girna
mere maqsum ka virana hai
havas bahut hai qisson par bhari hain
havas jante hain kaha nahin jante hue bhi sabhi jante hain
ki duniya paida hi nahin hui
jis men bhediye na hon sirf khargosh rah rahe hon
vo dekho vo koi safed khargosh hi to hai
jo abhi abhi is jhadi se uchhal ke is jhadi tak gaya hai
magar us ki safedi men thiik us ki gardan ki jagah
bhediye ke daant lagne se gahre khuun ka muqaddar laga hai
is tarah muqaddar ko khuun ke dhabbe men dekhna
kahan ki duniya hai
kya kabhi aisa hua ki maut ne apni ghiza men khud ko khaya
us chitrkar ko bula sako to bulao
zara jald bulao
ki vo kahin aur nahin hoga
chemistry ke shoabe men hoga
ki jahan rakhe hue har rang men us ke apne kimiyai aaseb ka basera hai
ham kisi na kisi rang ko khud taari hone ki davat dete hain
aur is ke aaseb se apni jild nuchvate hain
shiryanon ko udhadvate hain
har rang men basera karne vaale aaseb ne hamari mohabbat hi to khaya
is liye to main sote apne bete ko nahin jagata
ki vo har roz motor-cycle men petrol ki jagah
apne hisse ki bedari aur niind donon ko ek saath daal deta hai
is liye men der tak soti apni beti ko nahin jagata
ki vo kitchen men chaae banane ki abdiyat ko bhi
chaae ki pyali men undel deti hai