Zahir Ko Aaj Talta Hun

zāhir ko aaj Tāltā huuñ

bātin tirā khañgāltā huuñ

ai āsmān suraḳh-rū ho

apnā lahū uchhāltā huuñ

ā.īna-dār tū hī ban jā

maiñ ḳhud pe ḳhaak Dāltā huuñ

aa dekh zindagī ki kaise

saa.e meñ jism Dhāltā huuñ

hotā hai sard jab añdherā

sūraj tirā nikāltā huuñ

tū apne āstīñ se nālāñ

ik maiñ ki ḳhud ko pāltā huuñ

‘parvez’ kaun hai ki jis se

maiñ boltā huuñ chāltā huuñ

Leave a Comment