Shakeel Gwaliari
jaan ki baari hai ab dil ka ziyan aisa na tha
ḳhair jo kuchh bhi hua ham ko guman aisa na tha
saḳht jaisi ab hai qadmon men zamin aisi na thi
sar pe jaisa ab hai bhari asman aisa na tha
ik zamana ho gaya is raah se guzre hue
ye gali aisi nahin thi ye makan aisa na tha
tha ḳhas-o-ḳhashak ki manind apna hi vajud
sirf ham par hi giri hon bijliyan aisa na tha
us kinare ka tasavvur men bhi aana hai muhal
tha to pahle se samundar be-karan aisa na tha
apni nakami to pahle se muqaddar thi ‘shakil’
ham pe kuchh mushkil raha ho imtihan aisa na tha
Leave a Reply