Marte Dam O Bewafa Dekha Tujhe

marte dam o bevafa dekha tujhe

ik nazar dekha to kya dekha tujhe

ai pari-ru kyuun na main divana huun

baal khole barha dekha tujhe

nik.hat-e-gul bhi na laa.i ta-qafas

chal hava ho ai saba dekha tujhe

girya-e-bulbul par us ne hans diya

jis ne ai gulgun-qaba dekha tujhe

diid men har-chand sau nuqsan the

faeda ik ye hua dekha tujhe

halqa-e-gesu hai gardan men pada

aap apna mubtala dekha tujhe

kya tiri nairangiyan kiije bayan

sab men aur sab se juda dekha tujhe

barq-e-afat aaj hi ham par giri

varna hanste barha dekha tujhe

aaj tak ai bekasi chhoda na saath

ek sabit ashna dekha tujhe

ِduzdi-e-dil ka yaqin ho kis tarah

kis ne ai duzd-e-hina dekha tujhe

ham ne ‘ghafil’ but-kade men dahr ke

ek mard-e-ba-ḳhuda dekha tujhe

Leave a Comment