Jal Kar Jis Ne Jal Ko Dekha

jal kar jis ne jal ko dekha

tum ne us pagal ko dekha

ḳhvab diye aur a.ine men

aane vaale kal ko dekha

vaqt ke sab se unche pul se

aate jaate pal ko dekha

ḳhvahish ke changul se aage

hairat ke jangal ko dekha

sahra men ik kursi dekhi

kursi par sachchal ko dekha

dekhin tishna-lab ki ankhen

ankhon ke jal-thal ko dekha

badal jab dariya par barsa

dariya ne badal ko dekha

mausam ne jab karvaT badli

chadar ne kambal ko dekha

ankhon ki gahra.i jaani

peshani ke bal ko dekha

daldal ke sabze se guzre

sabze ke daldal ko dekha

maazi ke har peḌ pe ham ne

mustaqbil ke phal ko dekha

likhne vaalo haath uTha lo

kis kis ne maqtal ko dekha

tum ne ziddi dekhe honge

dil jaise aḌiyal ko dekha

mushkil kitni mushkil men thi

mushkil ne jab hal ko dekha

khurach khurach kar shak ne khaddar

mal mal kar malmal ko dekha

dariya pir-abad men kis ne

shalu aur shal shal ko dekha

qainchi jab Dam Dam par jhapTi

kikar ne pipal ko dekha

balTi gailan tasle dekhe

aur phir main ne nal ko dekha

dariya ki lahren gin gin ke

paani ki botal ko dekha

hairam dev ne sona kha kar

chandi aur pital ko dekha

dekha kya kya dekh raha hai

ghaur se jab goggle ko dekha

channel par ḳhabren to dekhin

ḳhabron ke channel ko dekha