Poet
sote hain phail phail ke saare palang par
ham chup alag paḌe hain kinare palang par
afshan ke zarre dekh ke saare palang par
samjha main loTte hain sitare palang par
puchho na mujh se shiddat-e-dard-e-shab-e-firaq
taḌpa kiya main raat ko saare palang par
lipTe hue paḌe rahe paTTi se ham alag
soya kiye vo chain se saare palang par
bechain ho ke farsh pe lag ja.egi jo aankh
chaliye ḳhuda ke vaste pyare palang par
us mah baghair niind na aa.i tamam raat
leTe hue gina kiye taare palang par
toshak ke phuul ban ga.e angare hijr men
dahka ki ek aag si saare palang par
qismat hai aage vasl mayassar ho ya na ho
aa.e to minnaton se vo baare palang par
iza.en sub.h-e-hijr ki kahne bhi ham na paa.e
vo shaam hi se aaj sidhare palang par
bahar hua main jaame se apne shab-e-visal
kapḌe jo us ne apne utare palang par
us mah-ru ki diid ka allah re ishtiyaq
gardun se TuuTe paḌte hain taare palang par
shab ko ḳhajil thi us ki safedi se chandni
chadar kasi thi aisi tumhare palang par
furqat ki raat ro ro ke dariya baha diye
takiye bane nahang hamare palang par
paTTi ke niche baiTha raha rat-bhar ‘qalaq’
rakkha qadam na ḳhauf ke maare palang par
Leave a Reply