Badiuzzaman Khawar
mujh ko nahin ma.alum ki vo kaun hai kya hai
jo saa.e ke manind mire saath laga hai
ik aur bhi hai jism mire jism ke andar
ik aur bhi chehra mire chehre men chhupa hai
mahtab to aa.ega na siḌhi se utar kar
divana kis ummid pe raste men khaḌa hai
milne ki tamanna hai magar us se milen kya
jis shaḳhs ka is shahr men ghar hai na pata hai
likhta huun na.i nazm-o-ghazal jis ke sabab main
vo zauq-e-suḳhan to mujhe virse men mila hai
maidan men chale aao to khul jaa.e ye tum par
kya shaam ki sarshar havaon men maza hai
socha tha mire saath chalega jo safar men
ghar par vo mira ḳhvab-e-hasin chhuT gaya hai
ham ‘mir’ ka divan the kya fahm pe khulte
aḳhbar samajh kar hamen logon ne paḌha hai
kahte hain ki us shahr men hai dhuum hamari
dekha hai kisi ne na jahan ham ko suna hai
bahar se koi aaj to ‘ḳhavar’ ko pukare
kamre men bahut roz se vo band paḌa hai
Leave a Reply