Abdul Mannan Tarzi
miri nigah ko jalvon ka hausla de do
guzar-basar ka koi bhi to aasra de do
tumhari bazm se jaata hai na-murad koi
safar-ba-khair ki jan-e-vafa dua de do
ata pe harf na aa jaae mangne se mire
khuda ho mere to phir hasb-e-muddaa de do
mita do meri nigahon se tum nuqush tamam
vagarna dusra mujh ko ik aaina de do
fareb-e-sharh-e-tamanna bhi kha le ab ye dil
labon ko jurat-e-iz.har-e-muddaa de do
junun-navaz-o-junun-khez-o-sad-junun-saman
tum apne jalvon ko aisi koi ada de do
adu ko shikva-e-lazzat koi na rah jaae
mire lahu ko kuchh aisa hi zaiqa de do
ghazal ki aabru tum ho ghazal mujhe mahbub
shuur-e-fikr ko uslub-e-khush-numa de do
ye dil to dushman-e-jani hai ek muddat se
jo gham-navaz ho aisa gham-ashna de do
libas-e-kohna ghazal ka utaar kar ‘tarzi’
ba-faiz tab-e-rasa ik nai qaba de do
Leave a Reply