ye vafaen saari dhoke phir ye dhoke bhi kahan
chand din ki baat hai phir log ham se bhi kahan
tum ko aana tha na aae vaqt lekin kat gaya
muzmahil hote ho kyuun ham raat roe bhi kahan
ped ye sukhe hue kuchh ye zamin tapti hui
chalte chalte aaj thahre ham to thahre bhi kahan
aaj to vo der tak baithe rahe khamosh se
rafta rafta bin-kahe halat pahunche bhi kahan
chand yaden chand aansu chand shikve aur umr
ishq to kiya tha magar ab ye saliqe bhi kahan
dil lahu hota hai yaaro baat ye asan nahin
lahza lahza rote guzri aur roe bhi kahan
Leave a Reply