labon pe ab koi ah-o-fughan nahin hoti
zaban se dil ki kahani bayan nahin hoti
ḳhalish to aaj bhi hoti hai mere siine men
nashist-e-dard jahan thi vahan nahin hoti
ḳhuda ne chaha to mil ja.enge kahin na kahin
bichhaḌ ke ḳhatm yahan dastan nahin hoti
jo ḳhud se milte hain ham be-ḳhudi ke aalam men
tumhari yaad talak darmiyan nahin hoti
vo qatl ho ke bhi qatil pe muskurati hai
ajal se ziist kabhi bad-guman nahin hoti
tumhare chahne vaale vahan nahin milte
dilon men dard ki shiddat jahan nahin hoti
Leave a Reply