zarra jo koi mehr ke misdaq ho gaya
sab shahr us ki dhuup ka mushtaq ho gaya
qasr-e-ḳhayal ḳhvab-e-makan astan-e-dil
rakkhi jahan bhi sham.a vahi taaq ho gaya
in ḳhvahishon ke naag ne kya Das liya mujhe
mohlik tha jo vo zahr bhi tiryaq ho gaya
vabasta ho ga.e hain ab us ki ada se ham
ham par bhi us ke hukm ka itlaq ho gaya
‘rahat’ pas-e-murad adab guftugu rahi
phir yuun hua ki vo bhi bad-aḳhlaq ho gaya
Leave a Reply