aarzu jin ki hai un ki anjuman tak aa ga.e
nik.hat-e-gul ke sahare ham chaman tak aa ga.e
be-ruḳhi se aap jab begana-pan tak aa ga.e
aaj ham bhi jur.at-e-jurm-e-suḳhan tak aa ga.e
mai-kada phir bhi ghanimat hai jahan is daur men
ek hi markaz pe shaiḳh-o-barahman tak aa ga.e
jal bujhe ahl-e-junun lekin kisi ko kya ḳhabar
kitne sho.ale ḳhud usi gul-pairahan tak aa ga.e
mo’atabar ho kar rahi divangi apni ‘surur’
jitne andaz-e-junun the bankpan tak aa ga.e
Leave a Reply