kahani ko mukammal jo kare vo baab utha laai
main us ki aankh ke sahil se apne ḳhvab utha laai
ḳhushi meri gavara thi na qismat ko na duniya ko
so main kuchh gham bara-e-ḳhatir-e-ahbab utha laai
hamesha ki tarah sar ko jhukaya us ki ḳhvahish par
andhera ḳhud liya us ke liye mahtab utha laai
samete us ke aansu apne anchal men to jaane kyuun
mujhe aisa laga kuchh gauhar-e-nayab utha laai
mayassar tha na koi ḳhvab in ankhon men rakhne ko
so main in ke liye ashkon ka ik sailab utha laai