gareban-e-qaba-e-zist men ik taar baaqi hai
ajal dam le abhi to manzil-e-dushvar baaqi hai
zara ai dil mohabbat ka tarana tez-tar kar de
abhi kuchh imtiyaz-e-kafir-o-din-dar baaqi hai
sitamgari ko tanha kyuun shi.ar-e-asman samjhun
abhi sharh-e-mizaj-e-charḳh-e-kaj-raftar baaqi hai
bala-nosh is ḳharabat-e-jahan se kis qadar guzre
lab-e-saghar pe zikr-e-rind-e-ḳhush-atvar baaqi hai
rahe garm-e-tavaf-e-dair-o-ka.aba muddaton lekin
tamanna-e-tavaf-e-astan-e-yar baaqi hai
Leave a Reply