ḳhvar-o-rusva na sar-e-kucha-o-bazar mile
hai yahi ishq ka e.azaz sar-e-dar mile
zindagi se ye raha apni mulaqat ka haal
kisi bezar se jaise koi bezar mile
ham se pahle bhi ye afsana bayan hota tha
kitne gham phir bhi hamen tishna-e-iz.har mile
zindagi ne koi a.ina dikhaya jab bhi
apne chehre pe hamen maut ke asar mile
fikr-e-ta.abir men niind uḌ ga.i divanon ki
ḳhvab apne hi un ankhon men jo bedar mile
muskurate hue chehron pe na jaao ‘maḳhmur’
shayad in men bhi koi tum sa dil-afgar mile
Leave a Reply