dhuup rakh di thi muqaddar ne sirhane mere
umr-bhar aag men jalte rahe shane mere
main tire naam ka aamil huun vo ab jaan ga.e
hadse ab nahin DhunDhenge Thikane mere
chand si un ki vo ḳhush-rang qaba vo dastar
un ki darveshi pe qurban ḳhazane mere
mauj-e-rang aa.i kuchh is taur ki dil jhuum uTha
hosh gum kar diye sarmast hina ne mere
phir koi lams mire jism men sho.ale bhar de
phir se yuun ho ki palaT aa.en zamane mere
ja tujhe chhoḌ diya ai gham-e-dauran main ne
varna ḳhali nahin jaate hain nishane mere
aisa lagta tha ki lauT aa.e hain guzre hue din
mil ga.e the mujhe kuchh dost purane mere
zindagi dekh li main ne tiri duniya ki jahan
vaqt ne chhin liye ḳhvab suhane mere
ab main sahil pe nahin main huun tah-e-ab-e-ravan
shahr-dar-shahr hain honTon pe fasane mere
gir paḌa sail-e-havadis mire qadmon pe ‘bashir’
haath thame jo buzurgon ki dua ne mere
Leave a Reply