Kis Ne Kaha Ki Chup Hun Miyan Bolta Nahin

Azhar Abbas

kis ne kaha ki chup huun miyan bolta nahin

jab aag bolti ho dhuan bolta nahin

raste ki baat ghaur se sunta huun is liye

rah men kisi se ham-safaran bolta nahin

yuun to har ek shaḳhs ka apna hi shor hai

lekin kisi se koi yahan bolta nahin

bas yunhi puchhta huun makinon ka hal-chal

barson se band hai ye makan bolta nahin

sar kha liya hai dil ne mira bol bol kar

kahta huun main jahan pe vahan bolta nahin

kitni hi dastanen sunata hai lahr lahr

kahne ko yuun to ab-e-ravan bolta nahin

dil men utarta jaata hai us ka kaha hua

chahe vo shaḳhs meri zaban bolta nahin