Aap to Raat so Liye Sahab

aap to raat so liye sāhab

ham ne takiye bhigo liye sāhab

dard kī dhuul ġham kī bād-e-sumūm

ghar kā darvāza kholiye sāhab

us ke dāman ko chhū ke aa.e haiñ

ham ko phūloñ meñ tauliye sāhab

talḳhiyoñ kā mizāj badlegā

zahar meñ qand gholiye sāhab

dekhiye ḳhud ko mere chehre meñ

aks shīshe meñ tauliye sāhab

ham bhī muñh meñ zabān rakhte haiñ

itnā ūñchā na boliye sāhab

‘mauj’ se mauj hai ishāra-kunāñ

bādbānoñ ko kholiye sāhab

Leave a Comment