zindagi ek aziyyat hai mujhe
tujh se milne ki zarurat hai mujhe
dil men har lahza hai sirf ek ḳhayal
tujh se kis darja mohabbat hai mujhe
tiri surat tiri zulfen malbus
bas inhi chizon se raghbat hai mujhe
mujh pe ab faash hua raz-e-hayat
ziist ab se tiri chahat hai mujhe
tez hai vaqt ki raftar bahut
aur bahut thoḌi si fursat hai mujhe
saans jo biit gaya biit gaya
bas isi baat ki kulfat hai mujhe
aah meri hai tabassum tera
is liye dard bhi rahat hai mujhe
ab nahin dil men mire shauq-e-visal
ab har ik shai se faraghat hai mujhe
ab na vo josh-e-tamanna baaqi
ab na vo ishq ki vahshat hai mujhe
ab yunhi umr guzar ja.egi
ab yahi baat ghanimat hai mujhe
Leave a Reply