Sher Singh Naaz Dehlvi
shab-e-firaq jo dil men ḳhayal-e-yar raha
pas-e-fana bhi tasavvur men intizar raha
uḌa rahe hain miri ḳhaak ko vo Thokar se
ilahi mujh se to achchha mira ghubar raha
nazar milate hi hathon se dil chala mera
kisi ko dekh ke dil par na iḳhtiyar raha
kisi ki nargis-e-mastana phir ga.i jab se
na vo surur na ankhon men vo ḳhumar raha
shab-e-firaq ki tanha.i men tha kaun aniis
ḳhayal-e-yar hi ik apna gham-gusar raha
vafa nahin to nahin murid-e-jafa hi sahi
hazar shukr ki main daḳhil-e-shumar raha
ye Dore Daale hain kis chashm-e-mast ne ai ‘naz’
ki hashr tak miri ankhon men ik ḳhumar raha
Leave a Reply